Pakisabi Pung Mayap


E pu maligwa ing susulat king Amanung Kapampangan, lalu na king kalupa kung e naman taganang matalustus king Amanung Sisuan. Ing kanaku kasi pamilit ku mu pauli ning kaburian kung makasulat king sariling amanu.

Pauli na pu niti, nung malyari mu pu sana, pakisabi pung mayap kareng ninuman pung mipapalili keti king kanakung malukang Blogerong Kapampangan, sana dinan taya pung ulaga ampong irespeto taya pu ing Intellectual Property Right. E ta la pu sana basta-basta kukunan o kokopyan deng akakit tamung makakabit king Internet kaybat bandian ta lang anti la mong kekatamu.

E ku la pu pagkaimut deng kanakung susulat. Anya pin pu papaskil ku la keti ba ku lang adake kareng bisang makapamasang Kapampangan, adyang pang maglupa ku mung salingpusa nung ilimpi mu kareng matenakang anak ning Literaturang Kapampangan.

Pasalamat ku pung maragul nung apagdamutan yu lang ditak a oras deng kanakung susulat keti, malakwas na pu nung aburi yu la. E ku naman pu mamarokan nung idake yu la naman deti kareng aliwa pa a palage yu makaburi kareng susulat ku. Kalupa na pu ning sinabi, e ku la pu pagkaimut anya pin atyu la king king internet. Mu pin, ditak mu pung respeto. E ta yu pu sana lalako lagyu ing ginawa, e mu pu keti nung e pati kareng aliwa pang akakit tamu king internet.

Isipan yu pu siguru kayabang ku naman magsalita. Bala mu mo atin makaburi kareng susulat ku. E ku pu asabi ing amanuan ku nung ala pa pung milyari kanakung makaniti. Keta pung atyu ya pa ing kanakung Kapampangan Blog, memaskil ku naman poesya ampong kuwentong Kapampangan karin, kaybat pin milyari ing amanuan ku.

Deta pung kanakung poesya, sinubmit da la pu king eskwela. Abalu ku pu iti uling  kaklase na la ning anak ku reng mig-submit. Ing masakit pu, leko de pu kanu ing lagyu ku. Ing kakadwa naman, ikit keng makapaskul itang kanakung kwentong “Deng Dating Mikaklase” king metung a Kapampangan FB group. Balu ke pung balu uling akung sinulat kanita, mu pin pelitan da la lagyu retang taung atyu karin!

Balu ku pu adyang sinulat ku ne iting pamakisabing mayap, e ku pa rin pu makasiguradung e na la malyari pasibayu deta. Pero adyang makananu pu, aintindian yu naman pu siguru nung nukarin ku manibatan, ampong sana makaisip la reng mamalak gawa pang makanita.

Mayap a aldo pu.