Bulan na ning Mayo, bulan na ning Santacruzan. Metung a matua ampong makule tradisyon a nung nukarin uulitan ampo papalto da ing pamanintun nang Reyna Elena king mawawalang Krus.
Gagawan da iti kabang magprusisyun la, maglakad katuki ampong kayabe la da pa ring aliwang reyna ampong eskorte. E la kabud mu magprusisyun, uling kabang maglakad la atin ya pang kayabe dula ing prusisyun.
Masanting a bage na angga ngeni tutuloy ta ya pa rin pu ing matwang tradisyon a iti. Ing pangadi ku mu pu, sana reng manimuna kareng Santacruzan , e da kakalingwan nung para nanu ya talaga iti.
Sana pu, e de gagawang fashion show o beauty contest uling e naman makanita ing sangkan na ning Santacruzan. Mas masanting pin pu sana nung reng egana-ganang atin kebaluan – manibat kareng mamuntukan, angga kareng eskorte ampong reyna, pati na rin deng tatalan arko ampong manyulu, aintindian dang masalase nung makananu megumpisa ing Santacruzan ampong nanu ing sangkan na.
Kanita, mas apilasan da ing karelang gagawan. Panamdaman da ampong e da isipan a kabud la mu magparada king dalan.
Kambe na niti, ing Museo ning Angeles, atin yang pung Santacruzan a maganap king a-22 ning Mayo king arap ning Pisamban Maragul (Holy Rosary Parish Church), mag-umpisa ya pung alas-kuwatro y medya ning gatpanapun.
Mikit-ikit tamu pu karin ba tamung akit nung makakanu dapat gawan ing Santacruzan.
Mayap a aldo pu!
No comments:
Post a Comment