Petisyun para king Amanung Sisuan

Ing Pampanga balen de ring Kapampangan... Kapampangan a lulugud king karelang Amanung Sisuan. Kapampangan tamu, pagmaragul tamu ita!

Anya mebigla kung tutu anyang abalu ku a ing Kapampangan aliwa ya pala ing basal ning amanu king Pampangan (Kapampangan is not the official language in Pampanga).

Pauli niti, deng mapilan a magmasabal a panimunan nang Apung Suku, mika-inisyatibo lang gawang petisyun para king Amanung Sisuan para gawan deng Amanung Basal (Official Language) keti king Pampanga.

Bilang metung a Kapampangan, agkatan da kayu pa a 'magpirma' king online petition a iti para king kekatamung Amanung Sisuan.

Puntalan ye mu pu ing Link ning petisyun keti para asulat ye ing lagyu yu bang mabilang tamu ngan king petisyun ampo maramdam ing boses tamu.

Dakal pung salamat.

Oini na naman!

Uling malapit na naman ing metung pang alalan, idake ke sana ing metung pang poesia patungkol king alalan pambarangay.


Oini na naman!
neng Royverine


Oini na naman! Oini na naman!
Daratang ing metung pang alalan
Ing dating bularit dang awsan
Ngeni balamu derby ne ing labanan

Mu pin ing makalungkot
Pauli na ning barangay ya mu
Deng aliwa gagawan dang pikatulan
At e na dapat pang pag-isipan

Miyayaliwang ugali ning pasaherong Filipino

Ini pu asulat ke pauli ning a-obserban kung panugali ampong miyayaliwang dapat da reng pasaherong Filipino. Nung madalas kayu naman sasake dyip, mapalyaring apapansin yu la naman deni... ampong mapalyaring, ararapat yu la naman deng aliwa kareti.

Nung sakali man pu atin mituran, panupaya pu. Obserbasyon ampong pansarili ku mu pung opinyon iti.

Miyayaliwang ugali ning pasaherong Filipino

Deng mahilig keng harap

Kerakalan deng lalake reni, oneng atin mu naman babaying makanini. Ala naman marok kanini, uling mas komportable naman talaga king harap. Kakadwa kanita, e ka mangadamusak a bitis kareng sasake ampong kukuldas nung ken kang harap. Asabi ku naman, metung ku rin karetang mahilig lulukluk king harap.

Gilu Mu Ku!

*Metung a poesiang mesulat pauli ning mayumung timan...


Gilu Mu Ku!
neng Royverine

Dinatang kang bigla
Gilu mu ku!
Manahimik ku keti
Gilu mu ku!
Masalese na ku sana
Gilu mu ku!

Ing Miki-dapat!

Ing miki-dapat!

Kwentuhan tamu pa.

Ating metung a dyip a mamasada, ing ruta na C-point-Holy-Hi-way, detang kule blue. E ne man masyado malati, e ne man masyado maragul... anaman ya ing bangko misusumangid.

Ing dyip a iti, magbiyahe ne papunta na king SM Clark. Buring sabyan, dinurut ne palengke ning Angeles, pisamban maragul, Holy Angel, Sto. Entierro, ampong AUF.

Medyo miswerti’yan ya king biyahe ing kaluguran tamung driver. Karas na pa kasi king main gate ning Marisol, sinapak ya. Mipa-intagun, SM la ngan kuldas pare-pareho ding pasaheros na... anya pin diretso ne mu ing byahe.

Bista man sapak ya, tahimik king kilub ning dyip uling e no man mikikilala deng pasaheros.

Kalambat Ku Palang Mulala!

Buri ke pu sanang idake iting kanakung minunang diling poesiang Kapampangan a sinulat ku. Mesulat ya  pu iti anyang banwang 2008. Kanita ku pu megumpisang sumulat king kekatamung Amanung Sisuan.

Sana pu aburi ye.

Kalambat Ku Palang Mulala!
neng Roy Dela Cruz

Kalambat ku palang mulala, antimong tupang mawawala
Pilit keng kakaulan, ing dila da reng banyaga
Kanta, poesia, ampong sanese, keng english ko tatalete
Na ku pa mo kapagmaragul, ing batal ku e me abakle

Santacruzan

Bulan na ning Mayo, bulan na ning Santacruzan. Metung a matua ampong makule tradisyon a nung nukarin uulitan ampo papalto da ing pamanintun nang Reyna Elena king mawawalang Krus.

Gagawan da iti kabang magprusisyun la, maglakad katuki ampong kayabe la da pa ring aliwang reyna ampong eskorte. E la kabud mu magprusisyun, uling kabang maglakad la atin ya pang kayabe dula ing prusisyun.

Masanting a bage na angga ngeni tutuloy ta ya pa rin pu ing matwang tradisyon a iti. Ing pangadi ku mu pu, sana reng manimuna kareng Santacruzan , e da kakalingwan nung para nanu ya talaga iti.

Bida Kapampangan, mag-Kapampangan la keti!

Ikwa ke rin atyempuan ampong ayalben ing palabas a iti, ing Bida Kapampangan. Asabi ku pung maswelo kung menalbe uling tutu lang mag-Kapampangan king show a iti.

Kalupa na pu ning pamagat ning palabas, reng bida keti wapin deng Kapampangan. Pauli ning Kapampangan la, kutnangan ampong pakisabyan da lang Kapampangan ding karelang bisita kaybat makibat no man Kapampangan. E da la babawal mag-Kapampangan.

Kapamu, bayu ing sabla. Pamipalino mu pu, e ya pu konektado i Blogerong Kapampangan king a palabas a iti o king istasyun a ginawa kaniti. Dadake ke mu pu ing kanakung malukang upaya king kanakung atagmuan a palabas a Kapampangan.

Magpakilala ku pu

Malaus kayu pu, keni king kanakung bayung bale. Magpakilala ku pu pala, aku pu i Blogerong Kapampangan.

Nung atandanan yu ku pu, atin na ku pu dating blog a Kapampangan, wapin pu itang Kapampangan Blog oneng ala ne pu ita ngeni pauli ning atin ya pung bayad ing pamag-mintina kanita. E ala na ku pung pamayad, anya pu e ku ne asundu.

Ngeni pu, ginawa ku ulit bayu kung Kapampangan a blog keni king Blogger. Ini pu libri mu pu, ala yang bayad anya palage ku medyo maglambat ne man pu ini.

Yari na pu introduction o pamagpakilala.

Siguro pu buri yung ikutang nanu ing maging laman na ning blog kung ini. Ing tutu na pu nyan, e ku pa pu balu nanung talagang maging laman na pero kerakalan siguro pamipasyag ning opinyun kareng bage-bage malilyari o akakit tamu king paligid. Siguro mu rin mapalyaring mamaskil ku naman kareng poesya ku keni kalupa ning dati kung gagawan ketang dati kung blog.

Angga ne pa mu pu keni, sana magbalik kayu potang atin ne bayung laman ining kanakung blog.

Pasibayu pu, magpakilala ku... aku pu i Blogerong Kapampangan.

Dakal pung salamat!