Ninu wari aku? Ala ku pung balak isalikut ing kanakung pangatao, e ku pu ugali ita anya pin magpakilala ku. Aku pu i Roy Dela Cruz... mibait, meragul ampo kasalukuyang makatuknan keng Angeles City.
Mas kilala da ku pu reng aliwa kung kaluguran a blogger bilang i The Struggling Blogger pauli nang ita ing mas minuna kung blog ampo karin ku mas minunang (ehem!) sinikat bagya.
Ngeni pu, gewa ke i Blogerong Kapampangan para naman pu mikadalan ku para makapagpasyag king kekatamung Amanung Sisuan, ing amanung Kapampangan. Aminan ku pu, e ku pa talagang masyadong biyasa ampong e malalam ing kanakung Kapampangan. Pero siguro naman pu, king kelambatan mabiyasa ku rin.
Ing katutuan na pu niyan, aliwa pu iti ing kanakung minunang blog a Kapampangan. Ita pung minuna ing lagyu na, Subukan Tamu Ing Kapampangan! uling talaga pung kakapkap ku pa kanita. Ing problema pu, itang host ku ketang blog a ita (makilibre ku mu pu kasing hosting karin) minyara yang alang pasabi, anya mewala ya rin ing blog kung ita.
Kakadwa naman ing Kapampangan Blog. Ita pu sarili ku ne ing hosting na, dot com ne pu ita ampo aku na mismo mamayad. Kaso pu, miras ku ketang puntong ala na kung pamayad kanita, anya pu itang blog a ita, kayabe da pu reng aliwa kung pang dot com a blog, mituklip la naman.
Anya ngeni mibalik ku king Blogger a nung nukarin ku talagang meg-umpisa. Libre ya naman pu ampo e ya pu magtuklip basta-basta.
Kaya pu abayan yu ku keti, ing kekayung Blogerong Kapampangan, magpasyag king kekatamung mayumung amanu... ing kekatang Amanung Sisuan... ing Amanung Kapampangan.
Mayap a aldo pu!
